Wendy het reeds 93 jeugboeke op haar kerfstok. Haar eerste jeugboek, Lena se bottelboom, wat in 2005 gepubliseer is, was op Exclusive Books se Publisher’s Choice-lys, het eervolle vermelding by die Noma Awards for Publishing in Africa gekry en was ‘n ATKV-Veertjie finalis. Haar werk is in vyf inheemse tale vertaal.

Wendy skryf eg Suid-Afrikaanse stories en versamel volksverhale en rympies wat kinders in moeilike sosio-ekonomiese omstandighede help om hulself te bemagtig. Haar verhale word gereeld in skoolhandboeke opgeneem en oor RSG voorgelees. Sy het haar onderwyservaring ingespan om die Ek lees self-reeks vir beginnerlesers te skryf en is opgewonde om Lapa Uitgewers se splinternuwe Bollie-aktiwiteitsboeke uit Nederlands te vertaal.